नेपाल बोटल वाटर संघद्वारा सरकारको निर्णयको बेवास्था, मंहगोमा पानी बेच्नु भन्दै गोप्य पत्रचार (भिडियो सहित)

रोशन कार्की

सरकारले तोकिदिएको मुल्यलाई लत्याउदै पानी उद्योगीहरुले जार र बोतलको पानीमा मूल्य बढाउन व्यापारीहरुलाई पठाएको गोप्य पत्र वाणिज्य, आपूर्ति तथा उपभोक्ता संरक्षण विभागले बरामद गरेसंगै यो अबैध धन्दा सार्वजनिक भएको छ । नेपाल बोटल वाटर संघले आफू मातहतका पानी व्यापारीलाई जार र बोतलको पानीमा मूल्य बढाई बजारमा कार्टेलिङ गर्न पत्राचार गरेको भेटिएको छ । चाडपर्वको समयमा अत्याधिक पानीको माग हुने भएको र सोही मौका छोप्दै पानी व्यवसायीहरुले बढी मुल्य निर्धारण गरेर बिक्री गर्दै आएपछि वाणिज्य, आपूर्ति तथा उपभोक्ता संरक्षण विभागले त्यस्ता कम्पनीमाथी कारबाही गर्ने तयारी समेत गरेको छ । वाणिज्य विभागका अनुसार गत साउनमा पानीको मूल्यका विषयमा गरेको अध्ययन प्रतिवेदनको पानालाई फोटोकपी गरेर त्यसैका आधारमा मूल्य तोक्न भनेर पत्राचार गरेको भेटिएको छ ।

पानीको मूल्यमा कार्टेलिङ गरेर पानी व्यवसायीलाई पत्राचार गरेको भेटिएपछि विभागले कडा कदम चाल्ने बताएको छ । नेपाल बोटल वाटर संघले कि त पत्राचार गरेको विषयमो कार्टेलिङ गरेको कसुरमा विभागले कारबाही प्रकृया अगाडि बढाउने जनाएको छ । विभागले बजार अनुगमनका क्रममा पानीको मूल्य बढाउन संघका तर्फबाट प्रशान्त डंगोलले हस्ताक्षर गरेको पत्र बरामद गरेको हो । किन मूल्य वृद्धि भएको हो भन्ने विषयमा बजार अनुगमन गर्दा विभागले बजारबाट कार्टेलिङ गर्न दिएको पत्र भेटी बरामद गरेको समेत जनाएको छ । पानी व्यापारीलाई मूल्यमा कार्टेलिङ गर्न संघबाट गत असोज १९ गते पत्राचार गरेको गरेको भेटिएको छ । सो संघले विद्यमान ऐन कानुन विपरित पत्र पठाएको ठहर विभागको रहेको छ । सो विषयमा नेपाल बोतल बाटर उद्योग संघका अध्यक्ष सुभास भण्डारीलाई पटकपटक फोन गर्दा समेत उनले फोन रिसिभ गरेनन् । वाणिज्य विभागले गत भदौ १० गतेबाट लागु हुने गरी जारको पानीमा प्रतिजार ५० रुपैयाँ र बोतलमा प्रतिबोतल १६ रुपैयाँ अधिकतम खुद्रा बिक्री मूल्य (एमआरपी) तोकेको थियो ।

तर, बजार मूल्यभन्दा बढी एमआरपी तोकिएको भन्दै प्रतिनिधि सभाअन्तर्गतको उद्योग तथा वाणिज्य र श्रम तथा उपभोक्ता समितिले उक्त मूल्य कायम नगर्न निर्देशन दिएको थियो । तर व्यापारीले भने सरकारले निर्धारण गरेको मुल्यलाई लत्याउदै प्रतिजार ६० रुपैयाँ र प्रति बोटल ४५ रुपैयाँसम्ममा बिक्री गर्दै आएका छन् । विभागले संघका प्रतिनिधिलाई सात दिनभित्र विभागमा उपस्थित भई स्पष्टीकरण दिन भनेपनि सो मिति सकिदा सम्म संघको कुनै पनि प्रतिनिधि जवाफ दिन भने गएको खुल्न आएको छैन । विभागले प्रशोधित पिउने पानी बढी मूल्यमा बिक्री गर्नेलाई कारवाही गर्ने भन्दै गत महिनामै सवैलाई पत्रचार गरेको थियो । बिनाअनुमति पानीको मूल्य बढाएको र घटाउन आग्रह गर्दा समेत नटेरेकाले पानी उद्योगी, ढुवानीकर्ता तथा खुद्रा व्यापारीलाई कारवाही गर्ने तयारी समेत गरेको विभागले जनाएको छ । (भिडियो साभार  : प्राइम टाइम्स टेलिभिजन)