असारे विकासका नाममा अर्बौ खर्च

- July 16, 2021 मा प्रकाशित

छिटो खबरको एउटै विकल्प
काठमाडौं ।  सरकारका विभिन्न निकायले चालू आर्थिक वर्षको अन्तिममा एकैदिन २९ अर्बभन्दा बढी बजेट खर्च गरेका छन् । असारे विकासका नाममा ती निकायले मनलाग्दी खर्च गरेका हुन् । नेपालमा प्रत्येक वर्ष असारे विकासको नाममा बालुवामा पानी खनाए सरि बजेट खन्याउँदा भ्रष्टाचार बढ्ने गरेको प्रशासकहरूको ठम्याइ छ । चालू आर्थिक वर्षको आर्थिक कारोबार हुने अन्तिम दिन बुधबार मात्रै सरकारले प्रशासनिक र विकासतर्फ गरी २९ अर्बभन्दा बढी बजेट खर्च गरेको महालेखा नियन्त्रकको कार्यालयले जनाएको छ । त्यसरी भएको खर्चको सरकारी निकायबाट प्रभावकारी अनुगमन हुन सकेको छैन । अनुगमन नहुँदा नै विकासका नाममा अनावश्यक खर्च हुने क्रम बढेको हो ।

एकै दिन २९ अर्बभन्दा बढी सकियो

महालेखा नियन्त्रकको कार्यालयका अनुसार विगतका वर्षहरूमा जसरी नै यसवर्ष पनि पछिल्ला दिनमा सरकारी निकायको खर्च ह्वात्तै बढेको हो । जसअनुसार बुधबार एकै दिन २९ अर्बभन्दा बढी खर्च भएको महालेखा नियन्त्रकको कार्यालयले जानकारी दिएको छ । कार्यालयका अनुसार बिहीबार भने सरकारी खर्च भुक्तानी सम्बन्धमा कुनै काम भएन । महालेखा नियन्त्रकको कार्यालयले बिहीबार हिसाब मिलानको काम मात्रै गरेको थियो । भुक्तानीका सबै प्रक्रिया बुधबार नै सम्पन्न गरिएको कार्यालयले जनाएको छ । महालेखा नियन्त्रकको कार्यालयका अनुसार अन्तिम दिन पुँजीगत (विकास बजेट)तर्फ खर्चको बाढी आएको छ । कार्यालयका अनुसार चालू आर्थिक वर्ष २०७७÷७८ को अन्तिम पाँच दिनमा मात्र ३७ अर्ब ६७ करोड रुपैयाँ पुँजीगत खर्च भएको छ । आर्थिक वर्षको अन्तिम समयमा मनलाग्दी खर्च गर्ने प्रवृत्तिलाई निरन्तरता दिँदै सरकारी निकायले पछिल्लो ५ दिनमा ३७ अर्ब ६७ करोड ८२ लाख रुपैयाँ पुँजीगत खर्च गरेका छन् । कार्यालयका अनुसार सरकारले बुधबार मात्रै १५ अर्ब ९७ करोड ७७ लाख रुपैयाँ पुँजीगत खर्च गरेको छ तर चालू खर्चसमेत जोड्दा यो तथ्यांक २९ अर्बभन्दा माथि पुगेको कार्यालयले जनाएको छ । यस्तै, सरकारी निकायले पुँजीगततर्फ मंगलबार ८ अर्ब १८ करोड ९२ लाख रुपैयाँ खर्च गरेका थिए । यस्तै, सोमबार ६ अर्ब ५४ करोड १२ लाख रुपैयाँ खर्च भएको थियो भने आइतबार ३ अर्ब ५० करोड ६० लाख रुपैयाँ खर्च भएको थियो । गत शुक्रबार ३ अर्ब ४६ करोड ४१ लाख रुपैयाँ खर्च भएको कार्यालयको तथ्यांक छ । महालेखा नियन्त्रकको कार्यालयका अनुसार सरकारले बुधबारसम्ममा २ खर्ब २७ अर्ब ७३ करोड ८४ लाख रुपैयाँ पुँजीगत खर्च गरेको छ । जुन लक्ष्यको ६४.५३ प्रतिशत हो । समग्रमा भने कुल ९१.१९ प्रतिशत बजेट खर्च गर्ने लक्ष्य राखिएकोमा ८०.०३ प्रतिशत मात्रै खर्च भएको छ । राजधानीबाट ।

 

प्रतिक्रिया

 

 

 

Find Us On Facebook

छिटो खबरका लागि लाइक तथा सेयर गरौं ।

TibraKhabar TV